العيون الملهمه

من زقزقات عصافير
متعلقه فوق في السما
قلبك دا حلمي
وأنتي العيون الملهمه
أنتي الشراع
ما أقدرشي أعوم
أنتي السحاب
وأنتي الغيوم
يا شمس قلبي المحرقه
يا كل كلمه حب سكناني
يا طاقه نور وحلم ونار
أنا حلمك في كل مدار
وأنا المستني دق الزار
يهز في جسمي يرجفني
يشد المد يحدفني
يهدي الجزر يقلعني
أنا جزرك وأنا مدك
قوليلي في حبي مين قدك
يعافر قلبي ويشدك
لا قوة ريح بتقلعني
في وسط الموج أنا صامد
بجدف بيكي يا شراعي
ومدام أيدكي بتطبطب
على كتفي وعلى دراعي
هألم في ايدي أوجاعي
وأطبق كفي على كفك
وأخرج م الوجع فرحك
ولملم حبك المخزون
وأجدف بيكي يا شراعي
يا كلمه حب ملياني
يا عيون حبيبتي الملهمه
::::::::::::::::::::::::::::::::: خالد صبح

درويشه غجر

يا مهره شارده في الطريق
مدي ايدينك للغريق
مدي ايدينك طبطبي
وأوعي بمشاعري تلعبي
واوعاكي تاني تهربي
وتغربي قلبي البريئ
..............
وأنتي في الحضره زحام
أوعي تخافي م الالام
وأرمي عيونك للأمام
تصبح وطن قلبي المكان
يا عيون حزينه في ابتسام
عايزك ف قلبي تفقري
يا بنت يا أم عيون زحام
شايلك في قلبي من زمان
قبلن ما أكون
بعشق حالاتك في الجنون
وأشوف في قلبك ميت سكون
درويش في عشقك للجنون
درويش في حبك وبجنون
درويش بأفقر
والحضره هايجه م الجنون
حبك جذبني في بحر غارق ف العيون
يابنت ياللي ظهرتي فجأه من اكون !!!!!!!!!!!!!!
......................
يابنت يا أم عيون جناح
بيطير ويهرب للبعيد
ويطير في قلبي ميت براح
وتسيبي قلبي معاه وحيد
وتسيبي قلبي
في حب نابت ف الخلا
يا اللي ابتديتي وقلبي بيكي أبتدى
ارميني جوه بحور عينيكي المنتهى
يا عيون بتحكي سر اسرار الهوى
حبك جذبني غصب عني
لقيتني طاير ف الفضا

من الالف الى الياء فلسطيني

نفسي يا حرف الاف ألف بيك الكون سنين
وأرفع رايات الحق مرفوعه فوق ع الجبين
وتكون بدايه بدايه للظلم اللي عم سنين
الباء: بدايتي ونهايتي في كل حرف سجين
والثاء: تجيكم محمله محمله نقطتين
: سنيورة متدلعه موصوله م اليمتين
والثاء: نقطها ثلاثه وهي غير السين
والجيم: جيه تجري متعطشه لنهرين
والحاء:حاجي بدري بسي انتو قاعدين فين
والخاء: خدني قلبي للبنت أم العيون حلوين
والدال: دلوني على بحركم وعيوني عطشانين
والذال:ذلي وذنبي أني انا حر وأمين
والراء:رموني بسهمهم رموش حبيبي الزين
والزاي:زمن زماني انشكح لما كنت حزين
ةالسين: سالت دموعي ع البنت اللي اسمها فلسطين
والشين:شايل همومك شيل وقلبي باكي بأنين
والصاد :صياد وصاد القدس وأنتو مطنشين
والضاد:ضلمتك يا ظلم بكرة يطلعلها الحق السجين
والطاء:طأ قلبي طأ عقلي لما طلبتي العون م المسلمين
والظاء:ظلموكي وسابوكي لليهود الملعونين
والعين:عيني عليكي يموت شهيدك ومين يبكيله مين
والغين:فينك يا غاندي محتاج لغاندي م المسلمين
والفاء:فارد جناحك وطاير يا ظلم وحقك جنين
والقافك:قف وأصمد يا فتى خد بثارك من المعتدين
والكاف:صن كرامتك تعلى هامتك تعيش عالي الجبين
والام:لا وألف لا دا احنا حرين ولاد حرين
والميم:متقولشي مالي ومال الاقصى وموت الحق والدين
والنون:نبكي ونبكي م الظلم نشكي فين الحهاد يا مؤمنين
والهاء:هواكي يابلدي عاش في قلبي سنين
والواو:وصل السلام والمحبه تايه يادنيا فين
والياء:اياكي اياكي تموتيني جنين

الوداع

قلبك المسلوب ارادته
انتهت فيه الحياه
شفت فيه احزان مشاعرك
صارخه رافضه للحياه
قلبك المسجون عشاني
شايفه بيتألم مكاني
شايفه داير جوه دايره
قلبي فيها لحد تاني
وأنتي دايره فيها ليه
بعد ماغضبتي عليه
سيبتي روحي
ليه تنوحي
وانتي بايدك الف مرة بتقتليه
قلبك العاشق بيحلم
انه يرجع
أوعي أوعي تصدقيه
لسه عايش جوة حلمك
وانتي حبك بتبيعيه
لسه فاكرة قلبي طفلك
قلبي شاب منك وضاع
والحقيقه ان جهلك
ضيعك مني الوداع
الودع ...... الوداع
الوداع

مشاعرك رقيقه

مشاعرك رقيقه بريئه و هوى
وفيها قلبي نام وحب ... ارتوى
ويبعتني النسيم لأبعد مكان
ما هو اللي دايب
وهو اللي هايب
عيون المهى
مشاعرك بتدي الامل صحبته
وتهدي اللي حب وقال غنوته
ينسج خيوطها خيوط النسيم
ويغزل خيوط الشمس ابتسام
ويبقى قمرها دليل محبته
مشاعرك مشاعري
وفيها المشاعر
وفيها اللي شاعر
بكل اللي فيه
وفيها المحبه
وود الصديق
وفيها الكلام
الحلو الرقيق
وفيها الفرج
من بعد ضيق
وفيها الكلام
اللي موش قادر اوصفه
اللي بياخدك لأبعد مكان
عند الجزيرة مفيش حد فيها
شجرها نجومها
ورودها ونعيمها
هتبقى لينا جنه
وتبقى الوطن
وفيها الغرام
اللي حب وسكن
.....................
............................. شعر / خالد صبح

زي القمر

زي القمر
زي النسمه
شايف عيونك
مبتسمه
زي القمر
نورة وضيه
مالقيتشي في العلم زيه
محلاكي يا أم عيون راسمه
راسمه أمل بكرة وبعده
راسمه الحنين اللي مواعده
يافرحته وسنين سعده
انتي النصيب وانتي القسمه
يا غلربتي وانتي مفارقه
والنظرة منك نار حارقه
تحرقني لو أقرب منها
تألمني لما أبعد عنها
وتقولي قرب وواعدها
أقول كلامي بعيوني
القى الكلام بيروح مني
أشوف غرامي في عيوني
سجني اللي ساجني
وراسم سجني على قدة
محبوس انا
ومين غيرك يطلعني
لجنه تانيه ودنيا تانيه
اعيش معاك وانته اللي تأمرني
.............................................
................................................... شعر خالد صبح

بتحب ليه

لما انته موش الهوى
بتحب ليه
تزعل وتغضب م الهوى
وتلوم عليه
وتقول دا حبيبي فات
فاتني في جروح وآهات
وتسيبني لما تشوفه
وتجري عليه
ياحبيبي ارحم قلبي
وارحم حبي
والحق عمري
ليضيع بين ايديه
حلفتك بيه وباشواقي
لتجيني تأخدني
في حضن عينيك
قرب وتعالى وهتلاقي
قلبي جنينه براحها ايديك
هتشوف عمري وعمرك فيها
وورودها غرامنا حواليها
ونسايم حايرة تيجيك تناديك
...............................ز
.......................................... شعر خالد صبح

للاسف

للاسف انا موش بحبك
للاسف بحب غيرك
قلبي مهما دار وعادلك
شايفه ساكن حلم غيرك
للاسف انا موش بحبك
للاسف بحب غيرك
............
للاسف انا موش طريدك
أو كنت من العاشقين مريدك
أنا قلبي تاه منه بريدك
وأنفلت في زمامه غيرك
للاسف أنا موش بحبك
للاسف بحب غيرك
.............
كنت حاسس وأنتي حاسه
كنت ضلك وأنتي شمسه
كنت آهك وأنتي خارسه
ليه في سكاتي
ضاع حنينك
للاسف انا موش بحبك
للاسف بحب غيرك
,,,,,,,,,,,,,,,,,
.............................شعر خالد صبح

يا عم يا بنى

يا عم يا بنى
افرش لنا الحنه
وأبنيلنا كام حيطه
لجلن ما تحمينا
قلوبنا موش ناقصه
تعشق وتتبهدل
ولا يوم تقوم باصه
لفوووووووق تقوووم تنزل
وتموت بآه خارسه
ولا حاله تتعدل
ونعيدها دي الكرة
في قلوب بتتغزل
مدهونه من برة
بزيف غرام يهبل
مخدوع ومين يقدر
على قلبه ويعزل
................
...............
يا عم رسينا
يا عم عدينا
دا المركبه شاردة
والبحر موج عالي
وقلوبنا فيه باردة
والشط ليه خايف
نقابله موش عارف
لبرنا مرسى
البر موش بري
والكلمه موش ليه
يا مركبي مري
فاض الحنين بيه
ليه بسي بتعندي
الرفض دا عندك
ولا عمرة كان عندي
والبر بيعاندك
حني بقى وأرضي
يا عم يا بنى
انيلنا في قلوبنا
كام أوضه لاحبابنا
بحري وع الميه

تأشيرة دخول

البتاع دا اللي اسمه قلبي
شفته مرة ماشي جنبي
قولتله ما تقوم يا صاحبي
شوف حكايه في قلوب البنات
..................
شوف لنا ايه المخبي
شوف لنا معنى الكلام
وحتى ايه معنى السكات
.............
بنظرة واحده تتوهم
تفرد قلوعها وتترسم
وتعيش على وهمك ساعات
....................
تشوف حليوة تنبهر
وقلوعناه تنزل تنكسر
والحب دا غير اللي فات
....................
२
شايف عيونك يا خبيثه
تحت الرموش بتبصلي
والقلب داقق الف دقه
من الخجل
قربت حبه
زادت محبه
قربت حبه
زادت خجل
خفت منها وسيبتها
ومرة تانيه شاغلتها
قالتلي خايفه
بس اقولك
خايفه خايفه
خايفه مني ايوة خايفه
ليه يا نني
م الكلام الحلو خايفه
شفتي صورتك جوه نني
ايوة شايفه
شايفه قلبك بيعمل ايه
ايوة شايفه
خايفه مني بس ليه
لسه خايفه
خايفه مني ولا منه
عمر ما كان الحب عافيه
حبي وحبك بتداريه
وتقوليلي اخيه عليه
هوه شاري اشتريه
نفسي اقولك حاجه تانيه
ايوة قول
قلبي فاتله وانتي نول
قلبك جوه قلبي جول
زي حدود وتأشيره دخول
خد يا روحي تأشيرة دخولها
وأخخدت تأشيرة دخولها
......................
........................ ३
بعيون جريئه تبصلي
أخجل انا
وكأني مولود بالخجل
خفت منها ومن عيونها
خفت من تصريح دخولها
خفت من أوهام جنونها
بعدت عنها وسيبتها
لقيتها جايه في الميعاد
قالتلي خايف
أيوة خايف
ليه يا روحي بس خايف
من عيونك
من جنونك
من رموشك
من جفونك
بصلتلي تاني
زاد الخجل
زاد الخجل
زاد الخجل
وكأني مولود بالخجل
قالتلي دوق طعم القبل
زاد الخجل
ورفضت تأشيره دخولها
.....................
................................ شعر خالد صبح

انا الذي

انا الذي عشت الحياه مضيعه
ماشي وشايل حبه مشاعر مقطعه
وفي وشي بسمه
نايمه حزينه مربعه
شايل في قلبي امل بيزيد
وفي عيوني حلم حب جديد
وانا الذي نايم مقرفص
وانا الذي داير بأحصحص
قلبي غيامه ضل شرقانه
وف عيوني الليل
وانا الذي فارد قلوعي
ومداري خوفي ما بين ضلوعي
وانا الذي موش منتشي
ولا حاسس بأني ف المحبه بارون
وانا الذي طاحن مشاعرة في هون
وانا الذي موش محتذي
وانا الذي قرفان قوي
وانا الذي ضميرة مات
وانا الذي حلمه نام من غير عشا
وانا الذي قلبه أختشى
وانا الذي مسجون في نفسه
وانا الذي حيطانه يأسه
وانا الذي انا بسي ايه


انا الذي اصبح مفيش
انا الذي اصبح مفيش
..............................
............................................. شعر خالد صبح

متحلمشي

من قلب وعشق وشوق مجنون
لكلام في الفاضي مالهوشي لزوم
نسهر في الليل والليل ساكن
نعصر في قلوبنا ونتمنى
أنه في لحظه شوق مجنون
نسرح جوه عينيه ونعوم
ونلم كلام الكون غنيوة
على قد عيونه وعلى قدي
ونغني بكل لغات الكون
ونسمع للكون احلامنا
ما هي ماعدتش خلاص احلام
ونلم العشاق قدامنا
نحكيلهم عن شوقنا كلام
اسطورة حب وعايشينها

والحاسس بالحب عبيط
والعايش في الحب عبيط
ازاي هنعيش في الحب قولولي
واحنا في عصر القرش
وعصر الكرش
النفوخ بالتخمه
التخمه اياها
بتاعه بيع الحب
والحب ازاي هنعيشه
وهو يا عيني مقصوص ريشه
من أمثال الناس البلدة
في أحساسهم
من أمثال الناس العايشه
بتمله في كروشهم
وانته يا عيني ما تملكشي
غير قلبك ومشاعرك
طز ومليون طز
صادق حبك طز
أصدق حب ياناس بنشوفه
عايش خوفه
والناس البلدة في احساسهم
هما سيوفه
وسهامهم في القلب
المجروح وبينزف هما ضيوفه
والقلب المتكبل في قيودة
عايش مهزوم في حدودة
موش من حقك تحلم يا بليد
يا بليد في القرش
طول ما انته ياصاحبي
من غير كرش
موش من حقك
خليك مهزوم احسنلك
خليك متقيد في حدودك وما تحلمشي
.................................................
...................................................... شعر خالد صبح

انتي الربيع

انتي الربيع
والنسمه لما تهل
والابتسام والامل
والراحه ساعه ضل
وانتي الفرح
والمرح
لما الحياه بتمل
وانتي انا
لحظه غنا
وانتي الهنا
لما الهنى بيقل
وانتي النهار والدفا
والقعده ساعه صفا
والشمس لما تطل
وانتي القمر والسهر
وانتي المطر للأرض
وانتي العمار والشجر
وانتي اللقا في البعد
وانتي الحنان والذل
.....................
انتي الغرام والهوى
والعشق للمهاويس
وانتي اللي قلبك دوا
يا جنه المتاعيس
قلبي وقلبك سوا
أجمل ما في المحابيس
والعشق مالي الفضا
طول ما روحك فيه
............................
وانتي الجراح والدوا
وانتي العطش والروى
وانتي اللي كلك كلي
ساكن ملامحي وضلي
همسك بعيد بيوصلي
بيقولي غرامك فيه
باكتبها من مهد طفولتي
انتي الحياه والحياه انتي
...................
............................................ شعر خالد صبح

قربيني

قومي قومي ورجعيني
قربي في حضنك خديني
حاوطي ع الحب اللي بينا
تبتسم تفرح سنيني
بسمه بعد فراقنا تكفي
كلمه بعد عذابنا تشفي
نظرة فيها شوقنا تعفي
قلبي شاري اشتريني
.......................
قلبي منك وانتي فيه
حاوطي بالاشواق عليه
واكتبي بدمك ودمي
يوم ميلادنا نبض فيه
واشهدي يا طيور وغني
عمري فيكي وانتي مني
مهما تبعد هتلاقيني
قربها قربي لعيني
.............
قومي قولي لليالي
تنشغل زي انشغالي
كنت زي النور قبالي
بس ابعد من خيالي
كنت حاسس وانتي جنبي
انك انتي روحي قلبك
أوعي بالاحساس تخبي
قربي لقلبي تعالي قربيني
ارسميني جوه ننك
تلقي قلبي الطفل منك
مهما بعدت روحي عنك
طيف نسيمك بيناديلي
وانتي لما الشوق يداعبك
أهمسي لقلبي في قلبك
تلقي قلبي قوام يجاوبك
لو بعيد عني يجيكي قربيني
.................................
اوعي اوعي في يوم تأني
لسه بكرة جاي أخضر
لو بعدنا الشوق هيكبر
لو قربنا هيكبر اكتر
يبقى أفضل قربيني
,,,,,,,,,,,,,,,,,,,,,,,,,,,,
........................................... خالد صبح

بسي انته تعالى وقرب

يا وابور عمري اللي بيجري
خليك على مهلك هدي
الشوق جوانا بيهري
وانا نفسي اقبل وعدي
..................
دا الحب يا عيني بياكل
في القلب ويصعب هرشه
عاملي في قلبي مشاكل
سارقني وسارق فرشه
وانا فارش قلبي أغاني
وجناين ورد وخضرة
أسي ودبل بستاني
ورماني من غير أجرة
وانا اجرة قلبي محبه
وانا ميه وردي مودة
وانا عشقه ان قرب حبه
هأعمله قلبي مخدة
ومخدة قلبي يا عيني
تحت الشباك البحري
جرب مرة وناديني
هأفتحلك انا ع البحري
وهأقولك بكرة لاقيني
فاتح قلبي ودراعيني
وفرشلك رمشي وعيني
فل وياسمين وأغاني
بس انته تعالى وقرب
هتلاقي الحب يقرب
ولا شمس علينا تغرب
ولا حلم ان كان في هوانا
يدبل ويخاصم خله
وبقايا الشوق جوانا
هتغطي العالم كله
بسي انته تعالى وقرب

رمز تاني للصمود

وبصوت حزين مبحوح
شايف صراخ وصروح
دايبه بتتفتت
والروح منين ما تروح
عفن وخلق جروح
فيها الامل نتن
يا بكرة يا أمبارح
مستني ايه قوللي
مستني ليل طارح
زهرة بريق المر
والمر من حلقي
يسقي البشر ويشر
يسيل يسيل
حتى ان ما قابله ريح
تلقى السنين
متسرسبه
تلقى العنين متصلبه
تلقى القلوب متحجبه
بحجاب يعل
................
...................
ارمي الحروف الخايفه
من مر العرق
ارمي الحروف الخايفه
من موت الغرق
ارمي الايدين المتقيده
في الضل
لمي الايدين الخايفه
من حزن الالم والذل
لمي اللي باقي وألضميني
في توب شجاعه
او توب محصن م الخضوع
مفيهوش رجوع
لميني جايز اقدر أكون
في توب جنون
أو رمز تاني للصمود
أو حلم تايه ع الحدود
يمكن اعود
يمكن أعود
يمكن أعود
في الضل

ما كفايه شجبي

وطن مبحلق
ووطن بيحرق
ووطن مطرشأ
على الاخر
وطن يصير
ساعه المصير
وف ايده جدله
زلطه ونبله
سميعه هابله
وصاروخ مقابل
..............
.............
اضرب قنابل
احنا القنابل
وفي المقابل
نلقى القنابل
بني ادميين
بنات بنين
عرسان عرايس
والكل هايص
والكل ناسي
كل المآسي
يا بلدنا آسي
دا ضميرنا مايص
عمال بيشجب
عمال يدين
وأصرخ وعلي
ساعه تجلي
وارسم وقوللي
أتهدي هدي
احنا التحدي
وان مدو مدي
وان دخلو فيكي
شجبي شاريكي
دا انا اللي باشجب
باشجب في صوتي
لحسن تموتي
وان موتي موتي
ما كفايه شجبي
عمال بيشجب
عمال يدين

هأووو عليكي شهادة

بتخاف من ايه ما تخافشي
أحلامك متسرقتشي
احلامك لسه في قلبك
سنيورة بتطلب ودك
اعشقها ومتكشرشي
وان طارت بيك في الجو
هأو يابعبع عو
,,,,,,,,,,,,,,,,
يا شبابنا ياضايع لسه
واخدين من الدنيا ملاطش
من الذل وشرب الخسه
والفلس اللي بيتوصى
على جيبي وجيبك باطش
والدنيا عارجه وعوجه
تتشطر بس علينا
وتسيب الجاهل فينا
يلعن ابو خاش اهالينا
يركب ويدلدل رجله
بالعافيه موش بالذوق
والعاطل هو العالم
والعالم كله مظالم
ووصولي بيطلع فوق
تعليمك موش هيفيد
ولا جامعه كمان ولا غيرة
والجاهل شغله اكيد
والعاطل بيمشي في ديله
والسارق بقى مسروق
,,,,,,,,,,,,,,,,,,,,,
نتعلم ليه يا بلدنا
والجاهل فيكي السيد
وياجامعه يا عز ولادنا
شهادتنا ايه بتتقيد
وبنمشي وهو يسوق
هأو يابعبع عو

آه يافلسطين

ومنين نجيب ناس يحسوا الكرامه ياهوه
وطن حزين مبتلي ولا حد حاسس بيه
غصنين سلام وحمام بينهم خداع شربوه
سلام محمل بالقنابل والتشرد فيه
::::::::::::::::::::::::
شرم برم لم حجارة
تصبح قنابل جبارة
شاربين من الدم سكارة
ودمهم ... مابيرويشي
،،،،،،،،،،،،،،،،،،،
يا دم سايط بلامعنى
الاقصى حالف يجمعنا
لو حتى مليون هيسعنى
كتر السلاح ما بيحميشي
،،،،،،،،،،،،،،،،،
احنا الايمان احنا القوة
وايمانا طالع من جوة
مهما نموت طالع غيرنا
وغيرنا ناوي مايبكيشي
,,,,,,,,,,,,,,,,,,,
عمك محمد وشمندي
حالفين مايجي الليل عندي
طول مانته فيها يا يهوندي
ليخلو عيشتك مناويش
,,,,,,,,,,,,,,,,,,
يا قدس اقصى يا ديارنا
ليموت حزين اللي غدرنا
واللي غدرنا يورينا
ازاي هيسكن هنا دارنا
وهيه ساكنه في نخاشيشي
,,,,,,,,,,,,,,,,,,,,,,,,
اقتلني على ارضي هأزرع
ودمي بدل النار يولع
اما ايمانكو اللي مخلع
هأقدر اخليه فشافيشي
,,,,,,,,,,,,,,,,,,,,,
لما انته قادر وريني
ازاي هتقدر على ديني
ابني يموت قدام عيني
وروحه قاعده ماتمشيشي
,,,,,,,,,,,,,,,,,
ابني الشهيد لسه ما ماتشي
واجه رصاصكو ومخافشي
لكن الحجارة اللي في ايده
ناويه وجودكوا ما يعيشي
اطفالنا نازله بخرابيش
,,,,,,,,,,,,,,,,

ترانيم على صدف البحر

صوت مدفون
جوة عيون
فيها النن التايه
يحلم انه يكون
أمواج وبحار
ومحار مدفون
بيكتب اسرار
على صدف البحر
جنون
البحر غويط
والحلم عبيط
بيحلم انه في لحظه يفوز
ترانيم أراجوز
يتنطط يعمل حاوي عبيط
من غير تقاسيم
ولا رقصه و موزة وهزة كمان
وموسيقى الغجر الاراجوزي جنان
والحلم العايم في الترانيم
بيكتب اشعار
انته الشاعر ولا شعور
ولا السارق ضي النور
ولا الرافض انك تبقى
جوة في حلم الحلم الزور
أوعى تكون
زي الزيف السيف
القاتل حلمي الطفل
أو زي الصدفه النايمه
في تحت البحر الكهل
أو زي الرمش الرافض كحل
أو زي الرافض أنه يكون
صوت مدفون
جوة عيون
فيها النن
التايه
يحلم انه يكون
ترانيم

عيونك صمتي

عيونك صمتي وسكاتي
وحبي وفرحي وآهاتي
ملامسه لقلبي يا حياتي
وحلمي كمان
وقلبك دافي بيرجفني
يا خدني بهمسه يخطفني
يشلني بلمسه يحدفني
في عشق جنان
وروحك فيه جواية
عامله لحبنا حكايه
حكايه حب جنايه
في اعلى مكان
حبيبتي تعالي نتهنى
ونبني في عشنا جنه
جنه حب علشانه
في بحر حنان
نحب الحب يعشقنا
وياخد حسه من بيتنا
يوشوشنا بشوق وجنون
دنا العاشق وانا المعشوق
وانا العايش في عشق وشوق
حبيبتي ليه وحديه
ما عادشي فروق
وانا ليها بحب اكون
ما دام جوايه في مشاعري
بشوفك فيه تتشاعري
لأحب الحب يا شعري
وأغنيله في أحلى عيون
هأحب عشانك الغرحه
ولو فيه هأجيبهالك
وأحب أشوقك البارحه
ولو عندي هأشيل هالك
عشانك قلبي يمشيلك
ما دام في القلب بيشيلك
ولو قربك هايجرحني
هأعدي بجرحي وأمشيلك
وحيد في الكون

حب قلبي

حب قلبي يا حلم عمري
يا حمايه من السنين
موش بايدي موش بخطري
قلبي في حبك سجين
حبك انتي هو قدري
مكتوب في قلبي وعلى الجبين
نبعك انتي نبع صافي
نبع شوق وفيض حنين

قلبي دا مخلوق عشانك
طير مسافر
طير معافر طير مهاجر
طير حزين
طير بيحلم بيكي انتي
هيسافرلك مهما كنتي
انتي بردة حدوح مدينتي
يا اللي في الاحلام سكنتي
يا اللي في جوة عيني عين
انتي قلبي يا قلب قلبي
قوليلي بس ازاي اخبي
من صغري با أحلم بيكي جنبي
ترسميلي حلم وردي
يمحي كل اللي في حياتي
من عذاب ومن انين

مغرم بحبك

مغرم بحبك يا ملاكي
يا فاتحه بالهوى شباكي
اطمني قلبي معاكي
بيرسم الجنه عشانك
نرسم قمر
انتي الاحلى
حبك قدر
احلى واحلى
رمشك اسر
هما الاسرى
قلبي وحبك وحنانك
مشتاق بحبك بأهواكي
واتمنى قربك ورضاكي
با أم العيون محلاه النن
مرسوم عليه قلبي اللي اتجن
امتى بقى قلبك هيحن
وتلقي في الحب مكانك
متخافيش لو دق القلب
هو دا عنوان الحب
ادخليه وخطي وسمي
هتحسي بنفسك وكيانك
..........................
.....

همسه

اللي انتي موش حاسه
بحر الغرام لسه
احلامه موش خاسه
احلامه
في ايدينا
انواره حوالينا
بتحس من لمسه
مدي هنا ايدك
نفرح
بيوم عيدك
دا الحب هيعيدك
من كلمه من همسه
قلبي مع قلبك
اشواقنا
تسبقنا
والنسمه هتقولك
ما في شيئ يفرقنا
قلبين في روح واحده
والنجمه
دي شاهده
محلاها ما احلى
فرحانه ويانا
وبحبنا حاسه

ليه انا وانتي

ليه انا وانتي دايما
في نفس المشكله
نعيش نحلم ببعض
وندوب كمان في بعض
ولما نبقى بعض
تزيد المشكله
حبيبتي ما عدش فيه
غير قلبي وروحي فيه
وجروحك ساكنه فيه
وعامله مشكله
ليه انا وانتي دايما
في نفس المشكله
ليه امان وزل
وحيره وحلم ضل
وشمس تبات حزينه
من حل المشكله
قمرنا هناك بعيد
واقف باصص علينا
والنجم هناك شريد
مستني أحضان ايدينا
تحل المشكله

نقطه بيضا

انا كان في قلبي مره
نقطه بيضا حلوه
النور كان فيها سارج
وبروجي الحب ضارب
لامم كل الحنان
ومحبه وروح مسامحه
وجناين ورد طارحه
حب وأمل وفرحه
وعيون واحه وأمان
لقيت الضلمه فجأه
هجمت ع النقطه ديه
وفضلت تعافر
النقطه البيضه فيه
وف اخر المعافره
لقيت ف القلب صرخه
والصرخه فيها شرخه
والشرخه في الصميم
والنقطه البيضا مالت
على الضلمه وقالت
على صغري هأقدر أمحي
ضلامك لو معافره
................
انا قلبي لسه فيه
النور دايما ماليه
لو ميت ضلام معافر
قلبي هيعدي فيه
ويعدي لبر بكره

بحبك تعالي يا اجمل صباح

بحبك تعالي يا أجمل صباح
يا ورد الجناين يا حبي المباح
بحبك تعالي نبادل في روحنا
نداوي جروحنا
ننصب قلوبنا
ملوك البراح
قلبك معايه وقلبي في ايديكي
وحبي وهوايه وروحي في عينيكي
ونسمه سعادة
هتزيد زياده
لو مرة هدت وعدت عليكي
بحبك تعالي يا أجمل صباح
.........................
بحبك تعالي قليل اللي باقي
ليه نسيبه يضيع في اشتياقي
غرامنا قدرنا مصيري ومصيرك
واللي يصيبني لازمن يصيبك
ما أنتي حبيبتي وقلبي حبيبك
وعمري اللي باقي في قلبك صباح
بحبك تعالي يا أجمل صباح
يا ورد الجناين يا حبي المباح

عمري ما حبيت غيرك لاه

عمري ما حبيت غيرك لا
ولا قلبي قبلك حس حياه
ماأنتي الضي لقلبي وعيني
وانتي الحضن اللي مدفيني
وانتي بقلبك بر نجاه
عمري ما حبيت غيرك لا
عمري ما حسيت انك ليه
لكن طيفك من حواليه
مالي الدنيا ومالي حياتي
ما انتي الضي لقلبي وعيني
وانتي الحضن اللي مدفيني
وانتي في قلبي اقصى مداه
عمري ما حبيت غيرك لاه

بحبك وعارف

بحبك وعارف معاكي مصيري
مصيري معاكي استحاله يكون
وعارف اكيد هتبقي لغيري
لكن بحبك وحبك جنون
نفسي تحسي اللي فيه تعيشيه
وتبقي ف قلبي حنان بيداويه
لكن معاكي أكيد مستحيل
يا نجمه وبادئه طبول الرحيل
حني بنظرة واحدة عليه
يكون عطف منك وبيها يكون
ليه تبقي جنبي وأحسك بعيد
يضيع حسي مني وحسك يزيد
وقلبي يغني بنبرة اسى
يحاول يحاول نهاره ومسا
يلاقي ميلادك في قلبه جديد
لكن لغيري حنانك يكون
بحبك وعارف معاكي مصيري
مصيري معاكي أستحاله يكون